Talmud (Taanit 21a) a Nachum kiti miching khat thusim akisun e, amachunga thilphalou ijat chujongle ama in Thiljouse hi HaShem in aphadinga abol ji ahi tin lungnom tah in Akilah jin ahi. Thilphalou ahiloule thilse aso tengle “hiche jong hi aphadinga ahi(gam zo letova)” tin ana sei ji in ahi, hiche jeh’a mijousen “Nachum Ish GamZo(GamZo pasal,Nachum) ” tia aminvo uvin ahi.
Phatkhat hin Roman lengpa hin Judate chunga khotona anei nadinga Roman lengpa kihoupi dingin Nachum chu alhengdoh uvin ahi. Nachum in Sana chule songmantam ho bom khat in lengpa alunglhai nadingin achoi in ahile lampi a inn khat a akingah panah’a inn neipa chun bom sunga thilmantam kikoi chu amu phat in akiguhdoh joua lei leh vut akoi pih in ahi. Ajing chun Nachum chu ema hephalouvin akipan doh in ahi.
Lengpa koma alhun jouvin Nachum chun Judate thalhenga lenpga henga abom chu api in. Bom chu akihon jouva avet uleh lei toh vutvai ngen aum in, hichepetchun lengpa in kijumso nadan in akilah in alunghan pumin Nachum chu tha dingin thu atan tan ahi. Hinlah Nachum chun amaiso’a lungkhamna tijatna kiti ema asodosah pon, chule angai banga “Hiche jong hi aphadinga ahi(Gamzo leTova)” tin asei in ahi. Lengpa thumop a apangho lah’a chu Eliyahu themgao ahungjao in, lengpa chu hitin asei pih e “Caesar, Judate’in najumso gut hiponte, ahiloule hiche lei le vut hi moh mei-mei hiponte. Kajahtoh abahle Juda masapen Avraham kitipachu leng li(4) hotoh gaal akisat petchun, amelmate chu lei le vut asep khum in hichejou chun HaShem in lei le vut chu tingcha leh thinathei gaal manchah asodoh pih ahi. Tua lei le vut ahinchoi jongchu hiche tabang chu himei thei ahi”.
Lengpa chu leng dang toh akidou pet ahijeh’a chu. Lei le vut chu gaal a choi a ga-patep ding tia thupeh api’in, atahbeh’a thilkidang ahungsoh in ahi lei le vut chu tingcha leh thi-nathei gaal manchah asohdoh in ahi. Hiche jeh’a Nachum tha ding atiuchu athat tapouvin chuleh hiche keuseh chu hilouvin pachatna leh kipaman jong achangin ahi.
Hoitah’a kigel leh inn neipa in Sana chuleh songmantam chu anagudohda henlang hileh lengpa henga akichoi pet achu lengpa analunglhei loumeithei ahi(ajehchu Roman lengpa chun Sana chule songmantam tamtah aneisa ahi), hinla lei le vut kichoi chu igelmasat leh vangsetna sangtah a kigel mei thei ahi, hinla Roman lengpa dinga thilmantam tah sanga mantam jo chule kimoh mulou thil hung kisohdoh ahi.
HaShem chunga Bitachon nei khat chun thilho hi itabanga vangsetna toh kilou jongle HaShem in amadinga thilpha langa asodoh nadinga ahung umsah ahi tia ahet jinga le phatseh’a kipahtah/aphalanga umjing thei ahi.(Likutei sichot vol.2 page 394). Hitabanga chu Sarah Imeinu injong HaShem chunga Bitachon anei jeh’a chu thiljouse chu aphalanga amuthei ahi. Eiho injong HaShem chunga Bitachon inei uva, itabanga hahsa jongle HaShem a’Torah le mitzvot toh ikilhakanglou ding uva HaShem in ivangbuoh jing uhen.